ld it at gb fr

Atlant linguistich dl ladin dolomitich y di dialec vejins, 2a pert

L ALD-II é la continuazion dl ALD-I publiché dl 1998 (te 7 volums y 3 CD-ROM). Depierpul che per l ALD-I fòvel vegnù enrescì la fonetica y la morfologia nominala y verbala elementara, se conzentreia l ALD-II sun l lessich, la morfologia plu menuda y la sintassa. La conzezion de basa teorica (“filosofia dl projet”), la metoda de enrescida y la rei de analisa resta unfat sciche pro l ALD-I.

Conzezion de basa teorica

L projet ALD ti và do a la tradizion dla geografia linguistica romanza, pieda via con l ALF de Jules Gilliéron y con l AIS de Karl Jaberg y Jakob Jud. L fin dl ALD é chel de cueie adum y documenté les competenzes dialetales (vuel dì: basiletales) de persones che rejona en linia de prinzip deplù lingac y che vif (o se sent da ciasa) te un di 217 ponc de mesurazion dl raion de analisa. Chestes persones „aministreia“ si raion de vita tres en juech compliché de convergenzes y divergenzes dialetales, che i dac coius adum per l ALD dess daidé conesce miec y analisé. Tl medem temp raprejenteia l ALD na analisa plu menuda de na pert dl raion bele studié ti gragn atlanc nazionai talians AIS y ALI y à con chisc la medema relazion che i desvalifs atlanc regionai franzousc (NALF) con l atlant nazional ALF.

Metoda de relevament

  • Esplorazion direta sun l ciamp da pert de dialetologs istruis aposta.
  • la trascrizion dles respostes giatedes vegn fata atira, paralelamenter végnel tout su na documentazion acustica per fins de control y de archiviazion.
  • a desferenzia dl ALD-I é per l ALD-II l chestionar vegnù damané fora demé un n iade.

Rei de analisa

Talia nord-orientala y Svizera sud-orientala: en dut na spersa de entourn 25.000 km², corida con 217 ponc de mesurazion a na destanza mesana de ca. 10 km. Regions o provinzies tochedes: 8 (da vest a ost): Engiadina auta y bassa, Lombardia orientala, Trentin, raion ladin de Südtirol, Venet setentrional y mesan, Friul ozidental (confronteia la cherta enjonteda).

Chesta homepage ne pieta nia demé na pruma vijion dla conzezion teorica y pratica dl projet ALD-II y de si obietifs, ma ala informeia ence sun la situazion atuala di laours.