ld it at gb fr

L archif dl ALD

Al zenter de laour per la elaborazion dl ALD, che fova vegnù metù su aposta tl 1985 tla université de Salzburg, ti vegnìvel dit da enlaouta encà “Archif ALD”. Fina de messel 2011 fova i trei locai dl archif tl fabricat universitar tla Streda Academia 24, dedò y fina dl 2013 ési stés tl frabicat nuef tla Streda Erzabt-Klotz 1 (entrami: A-5020 Salzburg). Te chisc trei locai fòvel duta la instalazion informatica per l’elaborazion digitala di dac dl ALD (PC, stampanta, plotter, server), i posć de laour di colaboradours dl ALD atifs a Salzburg (generalmenter cater persones) y les scafes, i armés y les corones che jiva debujegn per la conservazion de dut l material d’archif y di libri dla biblioteca dl ALD.

 

N iade che l projet ALD é vegnù ruvé y sclut ju (a la fin dl 2012), é l legat scientifich dl ALD vegnù partì su te does pertes y metù te doi posć desvalifs dl Uni-Park a Salzburg: cie che vegn nominé sot ai ponc 1-3 tla lista che vegn do é vegnù metù tles cianeves dl Uni-Park, depierpul che i libri dla “Biblioteca ALD” à giaté na lerch te na ciamena aposta (2.237) dla 2° auzeda dl
Uni-Park.

 

Inventar dl legat scientifich dl ALD:

  1. Duc i chestionars dl ALD-I y dl ALD-II (l original y na copia).
  2. Dut l materiai acustich registré tratant les intervistes per l ALD-I y ALD-II (ence chest tla verscion originala y una na copia) (ALD-I: cassetes C-90; ALD-II: minidiscs dla firma SONY).
  3. Diapositives a colours (“etnofotografia”) fates tratant les enrescides per l ALD-I y ALD-II: ca. 12.000 toc, che dà na vijion di abitanc, dl habitat y dla posizion geografica di 217 ponc de enrescida.
  4. La biblioteca scientifica dl ALD: chesta pieta na souravijion plu o manco completa dla situazion linguistica, storica, geografica y etnografica dl raion ALD y cuer emplù ciamò chisc setours dl savei: linguistica generala (dantaldut geolinguistica), linguistica cuantitativa, statistica, classificazion numerica, informatica, cartografia. Inventar atual (messel 2014): entourn 5.000 volums (monografies, gramatiches, vocabolars, atlanc) y articui singui, laprò n valgunes revistes spezialisedes. Entratant ti é la gran pert dles revistes compredes anter l 2985 y l 2014 vegnuda sourandeda a la Biblioteca Universitara. La cataloghisazion informatica di libri dla Biblioteca ALD é preveduda per l auton 2014.